|
|
Een Nieu Liedeken vande Berchse soldaten, hoe sy de stadt aen Parma vercochten. 1589 Op de wyse van Bruynsmadelijn. Segt ghy Berghsche Soldaten, Hoe waert ghy soo ghesint, Dat ghy hebt gaen verlaten Twelck u wel had ghedient, Moet ghy nu niet met my bekinnen, Dat ghy waert berooft van sinnen End oock al siende blint.
Hadt ghy niet badt ghebleven Vereenicht met Hollandt, Want t'was u al vergheven Al u groot onverstandt, Ghy moet nu bat u craghen, wagen En daertoe meer slagen, dragen Nu ghy dient den Vyandt.
U weelde gaet verkeeren Ghy meucht wel wesen gram, Ten Berch waerdy als Heeren Elck Hoer scheen een Madam, Neus end Lackerbeet vileyne Langhen Fleur end magher Heyne Was daer den hooghen stam.
Dit waren d'Edel Mannen Die daer hadden bevel, Jan van Maestricht ghebannen Oock Spillebeen kentmen wel Oock Lenaert Spronck en Houtepen, Alsulcke luyden vreesdemen Wat docht u van dat spel?
Magheren Heyn wilt hooren Was Edel van persoon, Een Papekint ghebooren Daertoe een Hoeren Soon: Alsulck ghespuys was daer den Adel Sy saten als Graven in den Zadel, Bloncken van goude schoon.
Vierslot had oock besteken Een Judas spel seer vals, Te Berghen ist ghebleken Daer van is veel gheschals, Dits oock een Boer van zijnen Vader, End daer toe een Landt-verrader, Hy kon Spaens ende Wals.
Eerst waerdy als Romeynen Gheacht end oock befaemt, Maer nu zijt ghy Vileynen Van alleman ghenaemt, Om dat ghy ghinght den Berch vercoopen Ende zijt daer uut gheloopen Als schelmen onbeschaemt.
Daertoe oock al u daden Die ghy eer hebt ghedaen, Gaet ghy nu selffs versmaden Den Spaengiaert hanghen aen, Ghy moet nu nae haer pijpen danssen, Tsy voor Steden of voor Schanssen U loon sult ghy ontfaen.
Moetwillich waerdy seere Teghen reden en recht: Ghy wout selffs blyven Heere, Nochtans waerdy maer knecht, Den Heere die ghy hadt gheswooren Die en woudy gheensins hooren U saecken stonden slecht.
Die u moesten betaelen Stont ghy ten dienste niet, Dus zijt ghy sonder falen, Wel waert wat u gheschiet, Godt en wil dat niet ghehinghen, Dat de Knecht zijn Heer sal dwinghen Dus naeckt u zwaer verdriet.
Waerom woudy niet hooren Nae die Heeren vaillant, Van Dordrecht uutvercoren, Die daer stelden te pant, Haer lyff end goet tot een verstijven, Dat ghy sout daer binnen blijven Betalen u contant.
Cornels end Capiteynen Hebben gheteeckent daer, Diet met der harten meynen, Als dat ghy sout voorwaer Tot alder tyt de Stadt bewaren Soo ghy deedt voorleden Jaren Maer nu zijt ghy onclaer.
Den Spaengiaert sal u klouwen, Met woorden wel bedocht, Denckt oft u is berouwen Dat ghyse hebt aensocht, U hooghen moet en mach niet baten Nu ghy hebt die Stadt verlaten, Zijt ghy oock al vercocht.
Ghy creecht wel uwen wille Beloften schoon van als Maer zy zweghen al stille Haer hart docht binnen vals, Ghy hebt aen haer veel trotz bedreven Dat en sullens u niet vergheven Maer brenghen u om den hals.
Sy sullen daerop toeleggen Om te korten uwen steert: Men salt noch hooren segghen Want ghy zijt straffens weert, Ten Berch en waerdy niet om dwinghen Zy sullen u hier of daer voorbringhen Te voet end oock te Peert.
Ghy sult nu singhen hooren In een Latijns beduyt, Van eenen Paep gheschooren, Zijn Preken overluyt: Ghy sult nu leeren nyghen en stuypen Smorghens vroech een Misken suypen Al eer ghy rijdt om buyt.
Ghy hebt veel quaets bedreven Aen Man, Vrouw, ende Kint, Die ghy bracht om haer leven Twas Vyandt ofte Vrint: U leven dat ghinck God verdrieten Ghy sult comen al te nieten, U straffe die beghint.
Ghy zijt nu wel bedeghen Met den Duyvel van Dort, Nu ghy hem hebt ghecreghen Die zijn Leven verkort, Men sal hem binden ende smijten, Hy moet zijnen dootstront schijten Als hy ghehanghen wort.
Oorloff int Concluderen Dit dient oock wel verhaelt, Dat zy nu vast mineren Die ten Berch zijn betaelt, Hier off daer wort d'een ghevanghen, En de rest moet worden ghehanghen, Verdienste niet en faelt.
Ick bid u trouw Soldaten Betracht altijdt u eer, En wilt oock niet verlaten Den dienst van uwen Heer, Al quam u schoon de Vyant terghen 'tZy voor Heusden off voor Berghen End ander Steden meer.
Hout u kloeck als Romeynen Ghetrouw tot inder doodt, En slacht niet de Vileynen En vreest gheenen aenstoot, Fy hen alle die overloopers, Ende oock die Stee-vercoopers Haer schande die is groot.
Prins, Heer, en Godt Almachtich Eeuwich ghebenedijt, U stercke handt seer krachtich Voert voor ons uut den strijt, Al t'voornemen van ons vyanden Wilt dat maken heel ter schanden Want ghy ons Heylant zijt. BISDOM. | |
|
Een nieu Geu-sen Lieden-Boecxken Waerinne begrepen is den gantschen handel der Nederlanden, in voorleden Jaren tot noch toe gheschiedt, de welcke eens deels onderwijlen in Druck uutghegaen, ende met meer andere by een ghevoecht sijn. Ende is nu vermeerdert met een Liedeken vant toerusten, af comen ende vergaen des gheweldigen Spaenschen Vlote, midtsgaders eenighe nijewe Liedekens vant innemen sommigher steden: eijndende mettet Jaer 91. Viue Dieu, La Santé du Roy, & la Prosperité des Geus. 1592
|
1592
|
Den Haag KB: 1708 D 40 |
f81v |
|
DBNL, naar Kuiper & Leendertz 1924. |
|