|
|
Een Liedeken eertijdts ghemaeckt by Jan Comen van Delff; ende gaet op de wijse vanden xxxvj. Psalm: Des boosdoenders wille seer quaet. Hy merckt nu claer,, die heeft verstant Wat leyder maer,, voor tNederlant Uut Spangien is ghecomen, sDuyvels dienaer,, des Paus trawant, Der Monicken vaer,, der Papen sant, Machmen Duc Dalf wel nomen. Van wat Tyrannen datmen leest Daer heeft noyt sijns ghelijck gheweest, Soo boos, soo wreedt van zeden: De Roode Hoer opt croonde Beest Wert nu opentlick onbevreest, Van Coninghen aenghebeden.
Dit Caims ghebroet,, fel ende quaet Heeft nu voorspoet,, haer boose daet, Door den Tyran moordadigh, Snel is haer voet,, vroech ende laet Om storten tbloet,, door nijdt en haet Van Abel onghenadich: Om dat die offerhandt bequaem, Voor Godt de Heer was aenghenaem, Sy mochte niet verdraghen, Dat men Gods woort reyn sonder blaem, Sou preecken tot Gods lof eersaem, Dat was haer een mishaghen.
Joabs geslacht,, zijn boosen aert, Is hooch gheacht,, lief ende waert, By den Tyran, den boosen, Sijt wijs bedacht,, broeders vergaert, U selven wacht,, u leven spaert, Schoudt altijt den godloosen, Wie meest verraet,, ende verstoort, Amasan in sijn bloet versmoort, Die wort nu meest ghepresen, Al had ghy Abner rechte voort, Ja oock u eyghen vaer vermoort, Ten sou gheen sonde wesen.
Tot sulcken feyt,, als Judas dee, Is nu bereyt,, tot elcker stee Elck van des Paus gheschoren: Autoriteyt,, commissi mee Is haer bescheyt,, na doude see Om Gods woort te versmooren: Want soude tvolck schriftuer verstaen, So waer haer neering gants ghedaen, Daer op sy hoeren houwen, Elck soud haer afgodry versmaen Jan melis in die halve maen Voor gheen Godt meer aenschouwen.
Dees drie voornoemt,, 't is lanck gheleen, Haer aert wel coemt,, recht over een Met dese Potentaten, Niemant en schroomt,, voor tfeyt ghemeen Maer elck beroomt,, hem groot en cleen Des Tyrans ondersaten, Sy obedieren zijn ghebodt Om dat sy dEgyptische vleyschpot Te bet moghen verwerven Met Mammon haren besten godt, Wie met Heliam sulcx bespot Als Ketter moet hy sterven.
Tis voor de wint,, met den Tyran, Uut vrees bemint,, hem wijf en man, Veel bloets doet hy verghieten, Wat hy beghint,, elck hout hem an, Dus hy verslint,, al wat hy kan, Tot het Godt sal verdrieten: Ghy Christen Broeders groot en smal Vervult moet zijn sHeeren ghetal Naer Joannis narreren, En oock moetet gheschieden al, Den Antechrist sijn swaren val, Ten sal hem niet faelgeeren.
Princen doch dit,, incorporeert Ghy die nu sit,, ende regeert Betracht wel u Offici, Maect niet besmit,, met bloet besmeert U handen wit,, in root verkeert, Noemt moort doch gheen justici: Want als ghy coemt voor Gods aenschijn Daer elck moet houden sijn termijn Op de sentencie passen: Al hadt ghy twater vanden Rijn, Met al dat inde Zee mach zijn, Ghy sult het niet afwasschen. | |
|
Een nieu Geu-sen Lieden-Boecxken Waerinne begrepen is den gantschen handel der Nederlanden, in voorleden Jaren tot noch toe gheschiedt, de welcke eens deels onderwijlen in Druck uutghegaen, ende met meer andere by een ghevoecht sijn. Ende is nu vermeerdert met een Liedeken vant toerusten, af comen ende vergaen des gheweldigen Spaenschen Vlote, midtsgaders eenighe nijewe Liedekens vant innemen sommigher steden: eijndende mettet Jaer 91. Viue Dieu, La Santé du Roy, & la Prosperité des Geus. 1592
|
1592
|
Den Haag KB: 1708 D 40 |
f83v |
|
DBNL, naar Kuiper & Leendertz 1924. |
|