|
|
Alst begint
1. Bachuis een droncker godt men houde u gebodt want men ons leet datmen u eet om te drincken wyn en bier met froukens fier soe lanck ast is perfekt
2. Comt deen dander te moet men vraecht hem metter spoet waer vinde wy geselechap bly om te drinken wel tien soe soet Ist kompangy
3. Dan Isset sae heer Waert lanck ons een gladde kaert om te sien wiet gelach betaele mach neege blick of 3 stuks room steken hebben sy ficks sy speelent allen dach
4. Komt er dan een slechte bloet Diet spel geen goedt en doet Dan Isset gaet u ganck En siet niet banck maer of hy leelyckyckt of sit en pryckt met het lach al aen syn wanck
5. wil die waert dan borge niet soe sietmen daer voerdriet soe blytter te pant van den noebelen quant syn mantel of syn hoet al metter spoet of de ringe van syn hant
6. Sanderen Daechs ist hoeft beroeit Dat goet dat is voerpoeit Dan wil hy hem rat voertreede wat of soe gaet hy oeck met een Die sarke treen Dat geldeloese padt
7. Meemt hy dan een goedt opset tsal hem werde belet soe komt hy ontrent een maecht bekent of dan siet hy hier of daer een fraey vreemt haer een meisie exsoelent
8. Terstont soe is den sin voeruaert Dat hert veel lust beegeert om te sien tfeenes dier Int freende quartier en met haer In bier en wyn Vrooelick te syn en maeke goede sier
9. Behaecht hem dan dat veenes lief soe doet sy hem gerief Dan kricht hy te met 2 dochters net wech heit hy dan dat speck syn flueit is leck Dan is hy fraey beset.
10. Dan lyt hy groet gequel pyn en weedom fel Dan krych hy te loen voor syn persoen tegen datter volcht nae het poedegrae Dat schenck ik veenes net
11. Gy Prinse nu raet ick u dat gy daer voer schue backhuis haet veenes veenes voerlaet soe en suldy koemen niet In sulcken voerdriet gelyck den meenigen gaet. | |
|
Liedbundel van Antonis van Butevest
|
[1590 ca.] [na 1594]
|
Leiden, Gemeente-archief, Gildenarchief no. 1474 |
f28r |
|
Afschrift Meertensinstituut (verm. door C.C. Vlam), naar bron, diplomatisch. |
|