|
|
Op de wyse: Soet roesie
1. Cuibydoe schoen wat hebdy nu gewracht klein veenes soen wie geeft u deese macht Dat gy my dert aendoen alsulcke smert ten is geen kint die soe voerwint syn vyant doer syn kracht Die dus doerschiet myn hert en Is niet blint want hy doorprent het al daer hy nae tracht.
2. Maer wat wil Ick veel klaege van dees pyn voer veenes strick en Is geen meedoesyn want Iuepiter schoen Daelde uit tsemels troen Claer als een gaut en heeft bedout syn liefs droeuich aenschin en baet het niet syn kroen Dat hy most gaen wit als een swaen om by leedae te syn.
3. Moet Ick dan treen In veenes kompangy Ick ben te vreen al schint het my perty Die oechies klaer van myn schoen lief eerbaer Haer weesen soet haer bly gemoet verdryft meelankoely al valt my tlyden swaer wat sy my doet ick neemt Int goedt gy maeckt myn Ionck hert bly.
4. Wout gy geheel vryen myn hert van rou als dee doer sminnen dou geen appel alleen ontstack die liefde reen maer gy oe godt uit tseemels slot Doerschoet die schoene vrou hoe wel sy scheen te dryuen spot met u gebodt bleef sy haer lief getrou.
5 Swich haet en nit swicht niders tonge quaet u schemp en spyt die wert van my gehaet Tsa geeft konfoort Lief doer een troestelick woert wat my geschiet en acht het niet al doer dees niders praet Laet haer niet syn voorhoert myn bloet voergiet Ick om u siet soe gy my lief voerlaet.
6. Suiuer prinses gy die myn thert doerprent waerdich maetres aensiet myn groet elent en geeft gehoer u trouwen serreuituir maeckt hem voerblit die om u lyt en leeft in swaer torment kreech hy eens faefuer tot niders spyt sou hy altyt by u weesen ontrent. | |
|
Liedbundel van Antonis van Butevest
|
[1590 ca.] [na 1594]
|
Leiden, Gemeente-archief, Gildenarchief no. 1474 |
f51v |
|
Afschrift Meertensinstituut (verm. door C.C. Vlam), naar bron, diplomatisch. |
|