|
|
Een nieu liedeken Op die wijse, Vader onse in Hemelrijck Hoort toe ghy minschen groot en cleyn de christus soect met herten reyn hoe dat de werlt is verblent alsomen siet oock omtrent den minsch stelt hem tondegen,, aen seer weynich op Gods wegen,, gaen.
De een de hout het mit calvijn die ander wil een luyter zijn de derde blijft noch een papist die vierde is een mennonist sy zijn certeyn al heel,, gedeelt want haer geloof noch seer veel,, scheelt
Christus de is voor u gecruyst hoe sydy dan soo onbesuyst dat ghy een ander kiest dan hem leeft na zij woort, anhoort zijn stem en keert u doch van alle quaet dat dunct my te zijn den besten raet
Deen roept seer luyt vivele ges mit woorden sieren gloriues dander vivele cardinaen mit woorden bitter als regael dit schiet niet sonder groot party men merct daer oock geen Christen by
Men slaet men vecht alom dit woort het maect veel twist en oock discoort niet alleen hier maer over al alsomen siiet hoort dit verhal het is schier houcx en cabbeliaus het mocht wel dien tot veel raus.
Tgeloove is een gaef van Godt hoe is de mins dan aldus sodt; dat hyt in dwingen wil mit cracht hoe veel zijnder ter doot gebracht al mit het water swaert en vier dit oock is geen Christen manier
Al maect de minsch veel mont geva zijn reden is een vont niet waer hy blyft vol boosheyt en bedroch dies machmen nu wel seggen och dat hy al op een ander siet zijn eygen faut en merct hy niet.
Ghy [sijt] so paulus heeft ghebrieft malcander schuldich niet dan lieft noch spreect Christus gebenedijt daer an bekentmen talder tijt dat ghy mijn lieve iongers bint als ghy malcander recht be mint
De vader sprack mit woorden schon dit is myn lieffste beminde soon daer in ick hebbe behagen,, goet, de al ons smert ons plaghen,, boet hoort hem alleen hy leert u best betrout op hem int eerst int lest.
Bidt dat dees prins sterct u gheloof ick weet hy sal niet wesen doof so veer als ghy op hem betrout hy sal verhooren ionch en out duecht volstandich altijc blijft also Gods woort ons claer beschrijft. | |
|
Een nieu liedeken Op die wijse, Vader onse in Hemelrijck [inc:] Hoort toe ghy minschen groot en cleyn
|
[1567 ca.]
|
Kampen Gemeentarchief: Oud Archief Kampen inv. nr. 2259 |
plano |
|
DBNL, naar Kuiper & Leendertz 1924. |
|