|
|
|
op de wijse: lest mael ginck Ick spanseere twas op een aevont stont
1. Oe schoen maecht gepreesen
gij sit mijn vruecht sertein
Ick heb u uit geleesen
hier In dees weerelds plein
om u Ick sou met groet berou
sterve den doet sertein.
2. In mijnen sin voer heeven
heb Ick u blom exspert
Ick en sal u niet begeven
maer blijven In liefde voerhart
aen siet eerst Jonst tis u klein Konst
van druck vrijt mijn Ionck hert.
3. Och Ick van u scheide
hoe dickmaels met geklach
sal Ick moeten voerbeiden
soe meenigen droevigen dach
tscheide valt suer als komt die uer
Die Ick niet gaere en sach.
4. Maer Ick hoep hat sal anders weesen
al wort het ons benit
Dat wij twee sullen weesen
met ons beiden met Joelijt
als vruecht voermeert en druck voerkeert
en alledinck heeft sin tijt.
5. Soe sullen wij twee met lusten
weesen sonder bedwanck
als Ick noch eens sal rusten
al In u armkes blanck
tsuer moet sin gesmaeckt eert soet genaeck
neemt Dit prinses In danck.
Geen lief ter weerelt en dat met eeren
Want daer en Isser anders geen die Ick sou begeeren. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f77v |
|
| Afschrift Meertensinstituut (verm. door C.C. Vlam), naar bron, diplomatisch. |
|
