|
|
|
op de wijse: Ick peins om een persoene
1. Ick truer om een Jonck frouwe
met alsoe groet geklach
mijn hertie Is vol rouwe
die mijn niet gebueren en mach
Ick wou dat Ick den heelen dach
Ick wou dat Ick den heelen dach
Dat Ick bij haer Int heimelick waer
en dat het niemant sach.
2. Dan mochse Ick bepraeten
Wasse daer toe gesint
Maer wilse mijn niet laeten
soo ben Ick een arm kint
Ick heb gerockent een ander spint
Ick heb gerockent een ander spint
een ander Ick sach, twas hart gelach
die liefde was voerblint
3. Dit is een vrijer rijcke
Die gelt heeft Int kantoer
nu moet Ickse beswijcken
Ick ben gestelt te luer
sij heit liever een rick monsiuer
sij heit liever een rick monsiuer
sij kickt nae goedt Ick heb geen moedt
rijckdom gaedt gans nu fuer
4. Ick stae niet In meemoerije
om haer liefste te sijn
Ick en vechter geen ficktoerije
daer ick droevich om ben
mijn lief keert doch om u sin
mijn lief keert doch om u sin
weest niet voerhart, acht op mijn smert
gij liefste antwoer mij (n)
5 Ick wil u recht aenschouwen
het is met u gedaen
gij muecht u hoeft wel klouwen
en bij een ander gaen
tis mijn om goedeken gedaen
tis mijn om goedeken gedaen
gelt is de loes dat Ick voorkoes
en mach dan proncken gaen.
6. Ist niet droevich om te hoeren
datmen seit gij muecht wel gaen
u moeiten is al voerloeren
het is met u gedaen
het koster mijn soe meenigen traen
het koster mijn soe meenigen traen
Ick ben voerblint gelick een kint
7. Mach Ick u niet gewinnen
soo ben Ick heel bekaeit
Ick stel u uit mijn sinnen
want de liefde Is voerwaeit.
gelijck een schip dat omme swaeit
gelijck een schip dat omme swaeit
gij omme vlicht, gij sijt soe licht
gelijck een weerhaen draeit.
8. Adieu prinsesse verheeven
scheiden Is nu den tijt
Ick wil u nu begeeven
want Ick om u veel lijt
Ick schelt u altemaele quit
Ick ben u sat gij jonge kat
want gij doet mijn groet spijt. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f92r |
|
| Afschrift Meertensinstituut (verm. door C.C. Vlam), naar bron, diplomatisch. |
|
