|
|
|
Alst begint
1. Ick heb die groene straete
soe dickmaels ten ende gegaen/ Ick
Dat Ick myn liefie moet laeten
Dat hebben myn vrienden gedaen
2. Ick en salse niet voerlaeten
Al waeren sy noch soe gram/ Ick
Ick salse gedachtich weesen
Dien dach die Ick sterven sal.
3. Ick stont op hooge bergen
Ick sach te seewaert In/ Ick
Ick sach een scheepie seilen
Daer wasser myn liefste In
4. Wat trock hy van sin hande
Van goude een vingerlinck/
wat hoe daer myn alderliefste
Daer Isser de trouwe van myn.
5. Wat sou Ick met dat vingerlinck doen
als Ick het niet draegen en mach/ wat
Secht dat gyt hebt gevonden
by die koetges Int groene gras.
6. Sou u vrou moeder vraege
Wie u dat vingerlinck gaf
Antwoerse met soe woerde
Die eens siaers die liefste was
7. Als alle die korsies bloeyen
Sy rypen aen eenen kant
Soe sal Ick u soetelief trouwen
En neemen u byder handt
8. Als alle die korsies rypen
sy rypen aen eenen steel
Soe sal Ick u soetelief trouwen
nu noch nimmer meer. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f108r |
|
| Afschrift Meertensinstituut (verm. door C.C. Vlam), naar bron, diplomatisch. |
|
