|
|
|
op de wijse: Ick lij Int hert pijn ongewont.
1. Soe haest mijn oech was gedaelt
Op een persoene
van een maecht schoene
Soe haest werde Ick oock doorstraelt
uit tseemels troene
van veenes soene
Die mijn ter sellever uer
zoe zeer geraeckte
Dat Ick der minnen vuer
gekreech tot mijn gebuer
Die thert duerblaeckte
2. Dees maecht wiens slave Ick nu sij
sinde geboogen
In haer vermoegen
heeft tot sieraet haer aenschins blij
twee klaer bruin oegen
daer op getoogen
twee winkhrauckens geheel swert
die elck een behaegen
als Ick die sie mijn hert
van pijn bevrijet wert
die zulcx moet draegen.
3. Den hemel die hier alles geeft
Dat is beneeden
verstaet mijn reeden
ganschelick niet voergeeten heeft
om met schoon heeden
En goede seeden
Dees maecht soe te voorsien
ende voorrijcken
dat men sech Ick mits dien
ter weerelt niet kan sien
haeres gelijcken.
4. Dees Ick met hert sin en moet
nu wil beginnen
gans te beminnen
op hoop dat Ick naet tzuer het zoet
Duer rein der minnen
Noch sal gewinnen
van dees prinses eerbaer
versiert met duechden
en dat mijn druck te gaer
verandert sal hier naer
(in) duisent vruechden.
Fynyes. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f128v |
|
| Afschrift Meertensinstituut (verm. door C.C. Vlam), naar bron, diplomatisch. |
|
