|
|
|
Een nuywe iaer
IHesus naem gebenedijt
Schelt ons van allen sonden quijt
Die wel in hem betrouwen
Daer om roept tot allen tijt
Verdraecht om hem spijt en verwijt
Ten sal v niet berouwen
Dat aen roepen wilt weesen vroet
Is bouen allen hoenich soet
Diet proeft die mach het seggen
Daer om verworpt al ongemoit
Ende leert wat gods saluinghe doet
Die scrifture salt v seggen
O jhesu mynder herter troost
Ick soeck v int west ende oeck int oost
Ende qualicken kan ick v vinden
Dat herte is moede benaut bewoest
In v wilt worden alleen verpoost
Laet myn doch niet verslinden [26v]
Ick roep v jhesu ontfermt v myns
Hoert mynen roep oft andersins
Moet ick verloren bliuen
Drie serpenten vol fenijns
Myn vervolghen alle sins
Als die scrifturen ons bescriuen
Ick dancke v here van hoghen macht
want mijnen strijt is wat versacht
Int dencken van uwer name
Jhesus woort aen wort mijn gedachten
Want daer in so vindick cracht
Alle menschen seer bequame | |
|
|
Devotieboekje van Marij Claes dochter
|
|
1e helft 16e eeuw
|
| Utrecht Museum Catharijneconvent, BMH 76 |
| f26r |
|
| Afschrift Johan Oosterman, naar bron, diplomatisch. |
|
