|
|
Och edel ziele anscouwet wat v mynne heuet gedaen sich hoe ic stae bedouwe mit wonden al ontdaen myn bloet hebbe ic gestortet wt op dat ic v mocht hebben o ziele in eenre bruut
Ic heb om v gestreden wal dertich iaer ende heb den doot geleden anden cruce ynt openbaer ic en kan v o ziele laten niet wilt dit gedencken als gi hebt swaer verdriet
O ziele als gi getroest wilt syn geholpen in uwer noet geuet my in allen liden toe verbliden o lief om di
? Geuet my in allen dat v liden ende smerte mit uwen roden wonden geprentet staen in myn harte ende ic v den wech moet volgen nae den gi myn lief van mynnen hier syt voer|gegaen
In allen dinen liden gedencket myn swaer pyn in gaet doet mynre syden ende ruest in dat herte myn ende wilt ene corte wyl liden om my du salste tot ewigen tijden o ziele verbliden mit my
O lief bouen al vercaren o alre getrouweste vrient om uwer swaere pinen die gi al onuerdient van mynnen woldeste liden om my geuet my in allen liden te verbliden o lief om di
Mijn lief dat vercaren haen dat is soe scoen gedaen dat sonne sternen ende maen des alle wonder haen wt dusenden vercaren blanck wit ende roet hi draget op syn hoeuet enen doernen rosen hoet amen | |
|
[handschrift zonder titel]
|
2e helft 15e eeuw
|
Berlijn, Staatsbibliothek Preussischer Kulturbesitz, ms. germ. 8o 62 |
f10r |
|
|
|
© 2024 KNAW/Meertens Instituut