|
|
.L. Dits die wise van Die daer iaecht. Het gaet oock op die wise van Tandermaken al opten rijn
1. Ick heb gheiaecht al mijn leuen lanc Al om een ioncfrou schone Die alder soetste wijngaert ranck Die is in shemels throone Si es met engelen also omset Ic en can daer niet bi comen Dat hebben mijn sonden belet Dies wil ick my ontvromen
2. Ick ben verdwaelt in deser nacht Die werelt heeft mi bedroghen Ghenoecht heb ick soe seere gheacht Mijn waen heeft mi ghelogen. Rijcheyt en eere heb ic bemint Ende ydelheyt vercoren Al iagende ben ic dus verblint Ende heb minen wech verloren
3. Ick wil op staen / this meer dan tijt Ende hem soecken alleene Der maghet sone ghebenedijt Iesus yst die ick meene Hi is den wech alsmen verclaert Ick wil mi tot hem keeren Den rechten wech ter maghet waert Sal ick aen hem leeren.
4. O Iesu heere nu bid ick dy Al wt mijns herten gronde Van sonden wilt mi maken vry Nu ende tot allen stonden Laet mi die waerde moeder dijn Met suyuerheyt aenscouwen Doer haer wilt mijnder ghenadich sijn Want mi mijn sonden rouwen.
5. Der enghelen vrouwe wilt op mi slaen V ontfermhertighe ooghen Ick heb so swaerliken misdaen Dus lijdt mijn herte dooghen Ghi sijt des sondaers toeuerlaet Ende onderstant der armen Ghi sighet daert al aen staet Wilt v doch mijnder ontfermen.
6. Vrienden / maghen / ende schat Die willen me beswijcken. Scrifture bewijst wel dat Ic moet van haer gaen strijcken O moeder Gods wilt mi bi staen Als ick sal moeten steruen Want elck sal loon na wercken ontfaen Wilt mi ghenade verweruen
7. Och die dit liedeken eerstmale sanck Was seer ghequelt van binnen Sijn vleesche heeft hem ghemaect so cranck. Dat hi was flau van minnen. Iesus dranc den bitteren dranc Aent cruys om smenschen leuen Bescermt ons van den helscen stanc Ende van dat eewich beuen | |
|
Een devoot ende profitelijck boecxken, inhoudende veel ghestelijcke Liedekens ende Leysenen, diemen tot deser tijt toe heeft connen ghevinden in prente oft in ghescrifte: uut diversche steden ende plaetsen bi een vergadert ende bi malcanderen ghevoecht. Ende elck lieteken heeft sinen bisonderen toon, wise, oft voys, op noten ghestelt, ghelijc die Tafel hier na volghende breed' uut wijst ende verclaert
|
1539
|
Haarlem SB: 176 K 9 (kat. A (f. 1-8) ontbr.) |
f29r |
|
Dirk Geirnaert, naar bron, diplomatisch. |
|