|
|
.XCV. Op die selue wise / oft op Tandernaken al op den rijn.
1. ALle minen troost die is bereyt Waer ic keere oft waer ick vaer Om eender vrouwen lieflicheit Alle duecht heeft si in haer Si is in reynicheden / maer Een edel vrou van duechden vry. Daer om mach ick wel seggen claer Maria mater domini
2. Als ic denc op haer grote duecht Die mi comen mach te baten So worde ic so seer verhuecht Ende moet al mijn trueren laten Na haren wille mach si saten Mijn arme leuen waer ick si Want si is machtich bouen maten. Maria mater domini
3. Edelder vrucht / oft reynder maecht En was ter weerelt noyt gheuoet Daer mijn herte ende sin toe draecht. Op haer heb ic so groten moet Si is reyn en daer toe goet Ende alle duecht die is haer bi Waer bi dat ick nu seggen moet Maria mater domini
4. Tot haer wil ick ghestadich sijn Then sal mi nemmermeer wesen quaet Si is die alder liefste mijn Ende mijn eewich toeuerlaet Hope ende troost daert al aen staet In reynicheden so is haer cry Si heeft een ioncfroulijc gelaet Maria mater domini
5. Nu groetse ghi heeren ende gasten Na den edelen hoogen weert So leefdy in vruechden vaste Als ghi dalder hoochste begeert So wat die werlt heeft verteert Dat sal die vrou al sonder sy Betalen aen den hoochsten weert Maria mater domini. | |
|
Een devoot ende profitelijck boecxken, inhoudende veel ghestelijcke Liedekens ende Leysenen, diemen tot deser tijt toe heeft connen ghevinden in prente oft in ghescrifte: uut diversche steden ende plaetsen bi een vergadert ende bi malcanderen ghevoecht. Ende elck lieteken heeft sinen bisonderen toon, wise, oft voys, op noten ghestelt, ghelijc die Tafel hier na volghende breed' uut wijst ende verclaert
|
1539
|
Haarlem SB: 176 K 9 (kat. A (f. 1-8) ontbr.) |
f56v |
|
Dirk Geirnaert, naar bron, diplomatisch. |
|