|
|
.CXIX. Op die selue wisen
1. LAet liden dat v nyet aen en gaet Ende en neemt v niemants dinck te naer Ende ordeelt na ws selfs quaet Ende neemt voort v seluen waer Onse oogen dicwils elders sijn Ende in haer seluen seer onbekint Daer om seg ic elcken int openbaer Weest horende doof en siende blint
2. In dit sterflijc corte leuen Verkiest altijt die nederste stede Versmaet te sijn / ende niet gepresen Dat is der ootmoedigen grote vrede Versmaet v yemant / versmaet v mede Ende laet God dat ordeel onbekint Ende cruypt altijt in simpelheden.
3. Wi willen ander daer toe driuen Dat si hemseluen laten sullen Wi en connen ons seluen daer niet toe crighen Om wt te gaen onsen eyghen wille O lieue mensche swijcht al stille Ende en weest niet dus onbekint Mer wilt eerst v quaetheyt villen Weest hoorende doof. &c.
4. Al den onurede die wi beseffen Die coemt wt ongestoruenheyt. Dat wi die dingen te seer opheffen Ende volgen der onredelicheyt. Het is nature en sinnelicheyt Die ons dus verre van God verureemt Dus seg ic so ic heb gheseyt Weest hoorende. &c.
5. Oft alle menschen volmaect waren Ende ons niet en worde op gheleyt Waer mede haer dan soude openbaren Ons selfs ongestoruenheyt Dus seg ick so ic hebbe gheseyt Als ons die dingen sijn onbekint So sijn si best in die beste vouwe gheleyt Weest hoorende doof en siende blint | |
|
Een devoot ende profitelijck boecxken, inhoudende veel ghestelijcke Liedekens ende Leysenen, diemen tot deser tijt toe heeft connen ghevinden in prente oft in ghescrifte: uut diversche steden ende plaetsen bi een vergadert ende bi malcanderen ghevoecht. Ende elck lieteken heeft sinen bisonderen toon, wise, oft voys, op noten ghestelt, ghelijc die Tafel hier na volghende breed' uut wijst ende verclaert
|
1539
|
Haarlem SB: 176 K 9 (kat. A (f. 1-8) ontbr.) |
f69v |
|
Dirk Geirnaert, naar bron, diplomatisch. |
|