|
Van vrou van Lutsenborch
DIe mi te drincken gaue
Ic songhe hem een nieuwe liet.
Al van mijn vrouwe van Lutsenborch
Hoe si haren lantsheere verriet
Si dede een briefken scrijuen
So veere in Gulcker landt
Tot Frederic haren boele
Dat hi soude comen int lant.
Hi sprac tat sinen knapen
Nv sadelt mi mijn paert.
Tot Lutsenborch wil ic rijden
Het is mi wel rijdens waert
Als hi te Lutsenborch quam
Al voor dat hooge huys
Daer lach de valsce vrouwe
Tot haerder tinnen wt
Hi sprac god groet v vrouwe
god geue v goeden dach
Waer is mijn here van Lutsenborch
Dien ic te dienen plach.
Ic en derfs v niet wel seggen
Ic en wil v niet verraen.
Hi is heden morghen
Met sinen honden wt iaghen ghegaen
Hi reedt heden morghen
Al in dat soete dal
En daer suldi hem vinden
Met sinen hondekens al
Hi sprack tot sinen knape
Nv sadelt mi mijn paert
Ten dale waerts wil ic rijden.
het is mi wel ridens waert
Als hi bider iachten quam
Al in dat soete dal
Daer lach die edel heere
Met sinen hondekens al
Hi sprac god groet v heere
God gheue v goeden dach
Ghi en sult niet langer leuen
Dan desen haluen dach
Sal ick niet langher leuen
Dan heden desen dach
So mach ict wel beclaghen
Dat ic oyt mijn vrou aensach
Hi sprac tot sinen knape
Spant uwen boghe goet
ende schiet mijn here van Lutsenborch
In zijns herten bloet
Waerom soude ic hem scieten
Waerom soude ick hem slaen
Ick hebbe wel seuen iaer
Tot zijnder tafelen ghegaen
Hebdy wel seuen iaren
Tot zijnder tafelen ghegaen.
So en dorfdi hem niet schieten
Noch niet ter doot slaen
Hi tooch wt zijnder scheyden
een mes van stale goet
Hi stac mijn here van Lutsenborch
In zijns herten bloet
Hi sprac tot sinen knape.
Nv sadelt mi mijn paert
Tot Lutsenborch wil ic riden
het is mi wel rijdens waert
Als hi te Lutsenborch quam
Al voor dat hooghe huys.
Daer quam de valsce vrouwe
Van haerder tinnen wt
Vrou god seghen v vrouwe
God gheue v goeden dach.
Vwen wille is bedreuen
V verraderie is volbracht
Is mijnen wille bedreuen
Hebdi mijnen sin volbracht
So doet mi sulcken teyken
Dat ic daer aen gelouen mach
Hi troc wt sijnder scheyden.
Een swaert van bloede root
siet daer ghi valsce vrouwe
Ws edel lantsheeren doot
Si trock van haren halse
Van peerlen een cranselijn
Hout daer mijn liefste boele
Daer is die trouwe van mijn
Vwe trouwe en wil ic niet
Ic en wille niet ontfaen
Ghi mocht mi ooc verraen
Ghelijc ghi uwen lantshere hebt ghedaen
Hi troc wt zijnder mouwen
Een siden snoerken fijn.
hout daer ghi valse vrouwe
Ghi sulter bi bedrogen zijn
Te Lutzenborch op de mueren
Daer loopt een water claer
Daer sit vrou van Lutzenborch
int heymelic ende int openbaer | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f13r |
|
| DBNL/werkgroep Joldersma, naar bron, diplomatisch. |
