|
|
|
Hier na volghen de voornaemste Feyten, die onder den nieuwen
Gouverneur, Don Lowys de Requesens gheschiet zijn. Item ten
eersten van den slag voor berghen op Zoom, daerse hem willecoom
geheeten hebben, ende sijnder hoocheyts eerste Mirakel gheschiet
is den 18. Januarij,
Op de wijse van Dueren.
Hoort toe alghemeyne
Al nae een goet nieu liedt
Laet ons God loven groot en cleyne,
Vande victori die daer is gheschiet,
Int laetste januarij, verstaet het bediet
God en verlaet de sijne niet
Hy castijt ons by maten,
Maer hy en wil ons niet verlaten.
Duckdalve met zijn Tyrannen
Trock na spaengien tzy u vertelt,
Een nieuwe Gouverneur liet hy te panden
Dien gaf hy over het gantsche ghewelt,
En seyde: Tis in Brabant wel ghestelt,
Verlaten moeten de Geusen het velt,
Dus vecht met blijde sinnen,
Hollant en Zeelant sult ghy wel winnen.
Tsestich schepen wilt aenhooren
Ten Oorloghe, zijt dies wel vroet,
Te Berghen quamen die als voren
Wel ghemonteert met schut, cruyt en loot
Middelburch te spijsen waren zy ghemoet,
Want sy dochten sonder teghenspoet
Te Middelburch aen lant te comen,
Dat hebben de Geusen vernomen.
Sy hebben oorlof ghenomen,
En maeckten haer op de vaert,
Aen Papen en Monicken sonder schromen,
Die seyden: vaert dat u alle heylighe bewaert,
En ons lief Vrou van Hal, tzy u verclaert,
Wijwater en was daer niet ghespaert,
Daer op hebbense wel thien Missen ghesongen,
Om dat zy Victory souden becomen.
Die daer hadden bevellen,
Van de geuse Capiteynen goet,
Die riepen wel lieve ghesellen,
Weest doch nu wel ghemoet,
Voor u Vaderlandt wilt waghen lijf en bloedt,
En de Prins van Orangie ons Heere goet,
Laet ons daer voor leven en sterven,
Prijs en eer sullen wy verwerven.
Als de Bootsghesellen vernamen,
Dat die Papisten quamen voort,
Sy vielen daer dapper ane,
Sy en spaerden cruyt noch loot,
Sy hebben gheschoten soo menighen schoot,
En worpen menighen Spangiaert over boort,
Wel duysent zijnder ghebleven
Sy moesten daer laten haer leven.
Thien schepen hebben sy ghenomen
Met het gheschut so cleyn ende groot,
De nieu Gouverneur mocht wel schromen,
Hy stont Sinte Martens dijck
De Spangiaerts riepen Misericoort,
Maer de Geusen smetense overboort,
Noch hebben sy tot haerder schanden,
Het elfste schip wel laten branden.
Ghy Monicken ende Papen,
Draecht rouwe aen elcken cant,
Middelburch moet ghy verlaten,
By faute van provant,
Ghy meent ons knecht te locken uyt Zeelant,
So dat ghy met ghewelt inden Haghe quamt,
Maeslantsche sluys verdringhen mede,
Wy wisten wel van uwe loose reden.
Oorlof ghy Heeren en Ondersaten,
Ende ghy Officieren vayliant,
Wilt onsen Prince niet verlaten,
Biet hem trouwelijcken de handt,
Op dat de Spangiaert de wrede Tyrant,
Mach gheroyt werden uyt Nederlandt,
En alle die Babels Dienaren,
Datmen Gods woort recht mach verclaren. | |
|
|
Een Nieu Geuse Lieden boecxken/ Waer inne begrepen is den gantschen Handel der Nederlantscher geschiedennis/ [sic] dees voorleden thien Jaren tot noch toe toeghedragen/ eensdeels onderwijlen in Druck wtgegaen/ eensdeels nu nieu byghevoecht. Midtsgaders sommighe schoone Refereynen/ ten seluen Propooste dienende/ hier achterbyghestelt. Nu nieuwelick vermeerdert/ ende ghecorrigeert. Pro Lege, Rege, & Grege. [houtsnede 'Viue le Gues'] Viue Dieu, La Santé du Roy, & la Prosperitè [sic] des Geus.
|
|
[1578?]
|
| Parijs Bibliothèque Nationale: Rés. p. Yi 24 |
| f63r |
|
| DBNL, naar Kuiper & Leendertz 1924. |
|
