|
|
|
Een liedeken, Op die wyse,
Die my eens schonck nae mijnen dorst,
Ick sal hem singhen sonder treuren.
Het Jonck bier van Bon,, voor Paep, Munick en Non,,
Om drincken ghebrouwen,
Een droncxken cleyn,, sal haer certeyn,,
d'Affgoden doen spouwen
Hoort Colen die licht op den rijn
U Papen leert beter huys houwen
Met hoeren drincken sy den wijn
Haer is nu bier te Bon ghebrouwen
Die Bisschop heeft een vrouw gaen trouwen
Hy noyt u t'sijnder bruyloft al
T'Capittel sorcht en is in rouwen
Dat haer de feest veel costen sal.
Dit bierken gist seer schoon geblomt
En is int ghijl wel opgheheven
Ras Papen met u vaetkens comt
Men sal der tonnen vul bier gheven
De Bischop heeft u lang gheschreven
Ghy sullet hebben goeden coop
Maer drinckt ghy't eer dat heeft ghedreven
Ghy crijght buyck pijn daer nae den loop.
Nochtans ist goet oock hooch gehopt
Gheen mout en wou de brouwer sparen
Ghy die dus langh hebt wijn ghesopt
Ick weet het sal u backhuys varen
Dus treckt nae Bon met groote scharen
Sijt uwen Bischop onderdaen
Oft moet ment bringhen t'sal beswaren
Int voeren salt oock over gaen.
Tbier is ghesoden wel ghestoockt
Met hulp van veel goey protestanten
Maer alsmen in de bruyloft cockt
Tvier sal wesen van houten santen
Die eens wijn dronckt van alle canten
En creecht buycken ront als een ton
Ghy Coolsche Papen luy trauwanten
Ghy moet proeven dat bier van Bon.
Maer crijghdy crimpsel inden buyck
Laet doch bekijcken u uryne
Een groot Doctor isser te Luyck
Hy sal u gheven medecijne
Hy is Bischop nae u doctrijne
Wat u miscomt ghenaeckt hem schier
Kan hy niet keeren uwe pijne
So is t'Bons bier wel crachtich bier.
So haest ghy dit bier crijcht int lijf
So suldij achter straten rollen
Want alle Papen drincken stijf
Haer penitentie is wel Cnollen
Sy hebben liever eenen vollen
Dan dijdel kanne twaer te slecht
Mar dit Bons bier sal haer niet bollen
Daer moet by sijn een Cools gherecht.
Twil u noch maken Malcontent
Den smaeck doet u aenscijn verwelcken
Tis tijt dat ghy aen Parma sent
Ciborien en al u kelcken
Hy sal u helpen want hy helpt elcken
Hy heeft seer gheren den ontfanck
Ghy vette papen laet u melcken
Het bier van Bon wert uwen dranck.
Haddy u dry Coninghen noch
Die souwen die Pap wel dick brocken
En helpen stercken u bedroch
Duck dalf isser me wech ghetrocken
Parma sal met de rest gaen focken
Brenght vry by een al dat ghy meught
Carfuysel Cappen en choor rocken
Ghy deed ter noyt me eenich deught.
Men sal de bruyloft spelen wel
Met trommelen ende trompetten.
Casemirus met goed opstel
Sal al de spijs op tafel setten
Ghy hebt ghebeyaert lanck ter metten
Beyaert ny voorts u missen vuyt
Men schincket u bier op u bancketten
En dat ter eeere [!] van de bruyt.
Ghy Monicken grau, blau, wit en swert,
Susters, Nonnen, ende Baghijnen:
Ras neemt den korf en gaet ter mert
Dees bruyloft wil seer bal verschijnen
Comt ghy paters van dAugustijnen
Het Bonsche bier set op den Dis
Ghy satheroosen laet u oock vijnen
Maert tsmaeckt seer quaelijck op den vis.
Des bruygoms komst wort wel verbeyt
Maer niet van u ghy Coolsche Papen
Hy sal u comen vry gheseyt
Met Heeren, Vorsten, volck van wapen
Hy wil u Gods dracht comen vercnapen
Deur de graven doen den intrey
Hy wil aldaer sijn bruyt beslaepen
Maer eerst u planten eenen Mey.
Cueulsche ghevaders spoelt de Kan
Het vremde volck wil met u drincken
Het Bonsche bier niet spaeren Dan
De Papen salment lustich schincken
Sy laten niet haer missen clincken
En haten dwoort dat Paulus spreeckt
Staet af vant quaet wilt dit bedincken
Den vromen gheen hulp en ontbreeckt.
Liet elck Paep sijn hoerery
En trouwde een huysvrouw met eeren
In vrede sou elck leven bly
En oock voldoen t'gebodt des Heeren
De wijn en sou in gheen bier verkeeren
Maer tcomt duer u godtloos op stel
Die Bischop sal u beter leeren
En toonen dat ghy sijt rebel.
Ghy gaffels en ghy Magistraet
En moeyt u niet met de gheschoren
Sy sullen ontfaen dubbel quaet
Dat sy ider schoncken te voren
De clachte quam voor tsHeeren ooren
Sy hebben sijn volck uut ghejaecht
Och waren sy nu noyt gheboren
Sy en werden hier noch hier nae geplaeght.
Ghy hebt gheleeft heel sonder sorch
Met Salentijn Bischop der blinden
Dat hy u helpt met Aremborch
Kondy anders gheen hulp ghevinden
Ghy wilt strijden teghen u vrinden
Die daer soecken u salicheyt
Gods gramschap sal se al verslinden
Die wederstaen sijn Magisteijt.
O Colen Keijserlijcke stat
Hoe heeft u tpausdom dus bedroghen
Doen Agrippina u besat
Doen waerdy van beter vermoghen
U leering is valsch en gheloghen
Die ghy voor waerheyt doet verstaen
Dit wil u Bischop niet ghedoghen
En neemt daerom de wapen aen.
Sy hebben met Brabant ghegeckt
Dat wij Mallaerts en sotten waren
Maer siet waer tvier nu henen treckt
God wil sijn cracht daer openbaren
Veel Crijchslie willen haer vergaren
Om te sien u sot Missen spelen
Sulck hebben wy lang doen verharen
Doet oock also so doedy wel.
Prince.
Al is van tbier ghesonghen hier
Men moet anders interpreteren
Hier met orloff reyn Prince fier
Den tijt salt al haest remonstreren
Ghy Vorsten wilt niet dilayeren
Valt de godtloose vry aent boort
De Heere sal u assisteren
Op dat elck gae in deuchden voort.
Ghedruckt buyten Colen | |
|
|
Voort, Jeronymus van der],
In deuchden voort (naamspreuk),
Een liedeken, op de wyse, Die my eens schonck nae mijnen dorst, ick sal hem singhen sonder treuren. Het Jonck bier van Bon// voor Paep/ Munick en Non// Om drincken ghebrouwen/ Een droncxken cleyn// sal haer certeyn// d'Affgoden doen spouwen
|
|
[1590 ca.?]
|
| Antwerpen Museum Plantijn Moretus: R 63-8 1, 53 |
| plano |
|
| Transcriptie naar bron, diplomatisch. Door Alexandra Kecskés, correcties door MdB (2016) |
|
