|
|
Hoe die Spaensche Hoeren comen klagen, om datmen de Spaengiaerts wil verjagen: Op de wyse van Wilhelmus van Nassouwen. Ick heb droefheyt vernomen Sprack daer een Spaensche Poet, Hier is qua tydingh ghecomen Die ons versuchten doet, Dat al ons fraey Seignoeren Moeten naer Spaengien Coen, Wat sullen wy Spaensche Hoeren Nu altemael gaen doen.
Seignore Jacomijne Och lieff Seignore Margriet, Wat raet Seignore Katlijne Wy blyven heel int verdriet, Wy sullen nu moeten hooren Dat tvolck roept wijs bedaert, Ghy spaensche Hoeren vercooren Maeckt u nae Spaengien waert.
Ach laes, tis al vant Varcken Sprack Seignora Margriet, Wy sullen moeten wercken Is dat niet groot verdriet, Wy hebben wel neghen Jaeren Ghegaen als Jonckvrouws schoon, Groot werck dat sal ons vaeren Wy zijns nu niet ghewoon.
Wy plachten den Boer te plaghen Om Wijn end Wittebroot, Dus moest hy ryden end jaghen Wy sloeghen de Hoenders doot, Als ander Crijchslieden Vrouwen Dan liepen op die Gaerd, Soo aten wy dat wy wouwen Ghesoden end ghebraed.
Ist datse nu verlaten Ons Hoeren alle ghelijck, Die Kindren op der straten Bewerpen ons met slijck, Zy hebben haer laten verdrijven t'Utrecht al van Vreeborch, Een voet voor t'gat te crijghen Dat is meest al mijn sorch.
Dat meucht ghy nu wel mercken Sprack daer een Spaengiaert saen, Die Koe is op, 't is vant vercken Onsen hoochmoet is ghedaen, Dat moghen wy wel dancken,, Mijn Heere van Bossue, Ghy Hoeren meucht wel schampen Wy zijn u allegaer mue.
Des moet der Duyvel waghen: Oyt Spaengiaert te hebben ghelooft, Van Vrienden ende Maghen Soo hebt ghy ons berooft, Ghy wout ons maken Gravinnen Van Steden en Dorpen moy, Nu moghen wy gaen spinnen, End bedelen broot om goy.
Ghy draecht Fluweelen mouwen Lobben end Ringhen aende handt, Daerop een suyveren bouwen, Als Madamme vanden Landt, Ghy en durves niet beclaghen: Groot goedt is u ghebeurt, Ghy waert eerst maer arme slaven, Verhackelt end verscheurt.
Wat wilt ghy ons versnouwen Ghy quaemt uut Spaengien coen, Met d'Ellebooch door de Mouwen Die Teenen door de schoen, Het Hembde door de broecken Bracht u Duckdalff int Landt, Ghy meucht hem nu wel vloecken Hy heeft u hier gheplant.
Adieu schoon Roose kloecke, Wy moeten nae Spaengien in als, Adieu Seignoor scheurbroecke Der duyvel breeckt u den hals, Ghy sult oock moeten wercken Soo wel als wyluyden doen, Met Rogghen bry gaen stercken Oft lappen oude schoen. | |
|
Een Nieu Geuse Lieden boecxken/ Waer inne begrepen is den gantschen Handel der Nederlantscher geschiedennis/ [sic] dees voorleden thien Jaren tot noch toe toeghedragen/ eensdeels onderwijlen in Druck wtgegaen/ eensdeels nu nieu byghevoecht. Midtsgaders sommighe schoone Refereynen/ ten seluen Propooste dienende/ hier achterbyghestelt. Nu nieuwelick vermeerdert/ ende ghecorrigeert. Pro Lege, Rege, & Grege. [houtsnede 'Viue le Gues'] Viue Dieu, La Santé du Roy, & la Prosperitè [sic] des Geus.
|
[1578?]
|
Parijs Bibliothèque Nationale: Rés. p. Yi 24 |
f98r |
|
DBNL, naar Kuiper & Leendertz 1924. |
|