|
|
|
op de wijze: Ick lij Int hert pijn ongewont en kans voerdraegen.
1.
Belast belaen met druck bevaen
Wert Ick beuonden
tot allen stonden
Dat ick quae paen hebbe gegaen
hoert mijn voermonde
geleeft in sonde
Sonder leit met vroelickheit
veel vruecht genietich
maer doer mijn onseedicheit
hier int tuchthuis geleit
Yst niet voerdrietich
2.
Hat Ick wel eer nae het beegeer
van vriende en maechde
mijn wel gedraegen
soe hadt ick veer tot mijnder eer
Moegen wech Iaegen
van mijn dees plaegen
maer volgent quaet
soe moet lck nu voer mijn misdaet
Dees soepere staet
Weer nu besueren
3.
Doet nu gij Juaecht ter wijl gij meucht
Wilt naerstich schouwen
Oneerbaer vrouwen
Want gij en muecht ncoh eer ncoh duecht
Een haer behouwen
Maer meer benouwen
hoe wel sij soet alst Duifken doet
liefelick treckbecken
Maer als voergaen is den vloet
van u gelt ende goet
sy met u gecken.
4.
Prinse drinck vrij met goedt geselschap blij
In vroelick heede
een kan met vreede
maer dat gij doert lanck weesen bij
niet en wort beestreede
van quaede seede
maer oeverdaet schout nae mijn raet
tot allen stonde
Dat gij doer u leeuen quaet
Int tuchthuis van den raet
Niet en wort gesonde. | |
|
|
Liedbundel van Antonis van Butevest
|
|
[1590 ca.] [na 1594]
|
| Leiden, Gemeente-archief, Gildenarchief no. 1474 |
| f18r |
|
| Afschrift Meertensinstituut (verm. door C.C. Vlam), naar bron, diplomatisch. |
|
