|
Van mijn here van Mallegem
MIin here van mallegem die quam gereden
Buyten brugge daer staet een lindeken breyt
Daer vant hi een herderken was cleyne
Hi moeste vertollen al wast hem leyt
Och herderken ic soude v gaerne vraghen.
mocht ic onbegrepen van v wesen
Waen coemt v die lustelijcken horen
Desghelijcx en hebbe ic niet ghesien
O Here Mallegem rijdt wech uwer straten
Want daer leyt v so luttel an
Stake ick op mijnen horen
mijn lammerkens souden werden gram
Dat herderken dede dat hem die heren baden
Hi sette den horen aen sinen mont
Die lammerkens quamen daer wt gesprongen
Ghelijc die hase loopt voor den hont
Och heere van Mallegem zijt willecom.
Willecoom so moet ghi zijn
Ons gelach moet ghi betalen
Wi drincken so gaerne den coelen wijn
Mijn heere van Mallegem ginc in zijn buydel
Hi langde daer die penninghen waren root.
Hout daer lieue ghesellen dats v gelach te baten
Want v geselschap is mi te groot
Si namen alle zijn ridders ghesmeyt
Ende alle zijn sware goet
Si lieten hem weder te Mallegem rijden
dat deden si om zijn edel bloet
Och wie wil hooren van lammerkens
Wi sullen den sanck verkeeren moeten
Vercken hebben so wilden swijnen
Si hebben handen ende si gaen op voeten
Die menige souse al te noode ghemoeten
Haer borstelkens dat zijn yseren
In haghen in bosschen si wroeten
Al onder groene rijseren
Dan brenctmense daer ter mert gedreuen.
Seer verstoort ende so schou
Gheen vleyschouwer en wilse coopen
Om dat haer borstelkens zijn rou
Dan gaetmense daer besiden drijuen
Besiden aen haer ghesellekens dans
Twaer mi leedt dat icker af songhe
Want voorwaer si zijn ongans | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f63v |
|
| DBNL/werkgroep Joldersma, naar bron, diplomatisch. |
