|
Van heer Danielken.
UIldy hooren een goet nieu liet
En dat sal ic ons singen
Wat heer danielken is gesciet
Al met vrou venus minne
Oorlof sprac hi vrouwe waert
Ende ic wil van v sceyden
Ic wil gaen trecken te romen
Al om des paus geleiden
Heer daniel wilt ghi orlof ontfaen
ic en wil v niet begeuen.
Laet ons in die camer gaen
die hoochste minne pleghen
dat en doe ic niet vrouwe fier
mi dunct in alle minnen sinne.
v ogen bernen al waert een vier
mi dunct ghi zijt een duuelinne
Heer daniel wat ist dat ghi segt
Ghi en dort v niet vermeten
coemt ghi uoch weder inden berch
dat woort en sal ic niet vergeten.
Trouwe neen ic ioncfrou stout
Nv noch te geenen stonden
En peyse ic om dijnen rooden mont
Die en achte ic niet tot allen stonden
Daniel wilt ghi oorlof saen
Neemt oorlof aen die grijsen
werwaert dat ghi henen keert
onsen lof sult ghi altijt prisen
Hi nam een staf al in zijn hant
Ende hi streec te romen binnen.
Nv bidde ic maria die moeder gods
Dat ic den paus mach vinden
Doen quam hi voor den paus ghegaen
Voor onsen eertschen vader
Here ic soude mi biechten geerne
Ende roepe op god genade
Ic soude mi biechten seer beureest.
Met alle mijnen sinne
Ic heb seuen iaer inden berch gheweest
Met vrou Venus die duyuelinne
Hebdi seuen iaer inden berch gheweest
Met vrou venus die duyuelinne
So sult ghi bernen eewelijc
Al in die helsce pijne
Die paus nam eenen drooghen stock.
Ende stack hem in die aerde beneuen
Wanneer desen stock roosen draecht
Dan zijn v sonden vergheuen
Vermaledijt moeten die pausen zijn
Die ons ter hellen drijuen
Si hebben gode so menighe siele ghenomen
Die wel behouden mochten blijuen
Hi tooch te ronsen opt hooge huys
Om drie zijnder suster kinder
Die nam hi al metter hant
Ende leydese bi Venus zijnder vriendinne
Al doen den derden dach omme quam
Dien droogen stock droech roosen
Men sant bode ende wederbode.
Om heer daniel te soecken
Doen hi voor den berch quam
Vrou venus die quam hem teghen
Segt mi segt mi daniel fijn
Hoe is die reyse gelegen
Hoe nv die reyse is gelegen
Daer toe is mi so leyde
Die paus heeft mi sulcken troost gegeuen
Eewelic van god te zijn ghescheyden
Si sette hem eenen stoel
Daer in so ghinck hi sitten
Si haelden hem eenen vergulden nap
Ende wilde danielken schincken
Hi en wilde eten noch drincken
Si wilde eenen raet versieren.
Hoe si in die camer sou_de comen
Met seuen camerieren
Mer doen si wter camer quam
Al lachende ende al spelende
Al had si eewelijck ghespeelt
Heer Daniel die hadde ghesweghen
Mer die dit liedeken eerstwerf sanck
Sijn herte lach hem in dolen
Hi was lieuer in venus bedwanck
Dan in helsche scholen | |
|
|
Een schoon Liedekens. Boeck inden welcken ghy in vinden sult. Veelderhande liedekens. Oude ende nyeuwe Om droefheyt ende melancholie te verdrijuen. Item hier sijn noch toe ghedaen Meer dan Veertichderhande nyeuwe/ liedekens die in gheen ander liedekens boecken en staen. Hier achter aen vervolghende [Antwerps liedboek]
|
|
1544
|
| Wolfenbüttel Herzog August Bibliothek: A: 236.5 Poet |
| f88r |
|
| DBNL/werkgroep Joldersma, naar bron, diplomatisch. |
