|
|
|
Dit lyedekijn is van Sinte Elysabets dochter, die hertochin van Enghelant, ende is seer suverlijck.
1 Die strijt van Vlanderen is opheven,
Des dorden dach is sij nederghegaen;
Doen ghinc die edel haertochinne
Soe druflijc in haer camaer staen.
Doen ghinc etcetera
2 Sij wranck haer handen, sij toech haer gheeluhaer.
Si riep Maria, die Moeder Gods, an,
Och, dat Sij Haer woude ontfermmen
Over haer ende alre liefsten man!
Och dat Sij etcetera
3 Doe quam dien enghel al van hier boven.
‘God troest u vrou, ju ghebet is ghehoert.
Heb di liefver van eenen kijnt te sterven
Of uwen man versleeghen doot?’
Heb di liever etcetera
4 ‘Van eenen cleyne kijndekijnt te sterven
Des en acht ic niet en kaf,
Opdat ic mijn prijns, my edel lantsheere,
Sien ende hoeren ende spreken mach’.
Opdat ic mijn prijns myn etcetera
5 Doe quam die enghel van hier boven.
‘God troest u heer, ju ghebet is ghehoert
Enghelant heeft die strijt ghewonne,
Vladeren is vaersleghen doot’.
Enghelant etcetera
6 [xxvi/39r] Al daer hij al over dier heyden reet,
Daer verhoerde hij alsoe blijden maer,
Hoe dat sijn edel hartichinne
Van eenen jonghen soen vaerleeghen was.
Hoe dat etcetera
7 ‘Ghistere avont wan ic die strijt van Vlaenderen,
Nu heb ic eenen jonghen soen.
Nu bid ic Maria, die edel Connine,
Dat my ghen leyder maer en coemt!’
Nu etcetera
8 Al doen hij op die camaer trat,
Hoe drufelijc dat sij op hem sach.
‘Sijt velcoem mijn prins, mijn here,
Nu sidt velcoem, mijn alreliefste man.’
Sidt velckcoem etcetera
9 ‘Och vrou, dat moet ju den rijcken Heer God loenen.
My dunct, ghi sijt soe seer ghestort.
Hebdi enighe leide maer vernomen
Die ghi soe noede hebt ghehoert?’
Heb etcetera
10 ‘Ghisteravont was ic vrou van guede,
Nu leg ic in crancken schijn.
Nu bid ic Maria, die waerde Conninen,
Waer ic dien eersten nacht sel sijn?’
Nu bid ic Maria etcetera
11 Doe quam die enghel van hierboven.
‘God troest u vrou, ju ghebet is ghehoert.
Den alre eersten nacht soe selt ghi rusten
In Onser Liever Vrouwen schoet.’
Den etcetera
12 ‘Heer, nu doet u kijnderen wel
Ende scat u landeken niet te ser.
Och werwaert dat ghij heenen rijt
Soe bid ic, voer eenen rechten lantsheer’.
Och werwaert etcetera
(1) Die strit | |
|
|
Handschrift Meerman
|
|
[1525 ca.]
|
| Brussel KB: II 2631 |
| f38v |
|
| H. Joldersma, naar bron, kritisch. |
|
