|
|
|
Eyn vrolick nu liet
Tis beter yet dan niet.
Ho byn ick in dit verdriet?
Ick en derse noemen nyet,
Ich hebse lang gefryet.
Sall ickse moten derven,
So sall ick van ruwe sterven.
Wartoe, wartoe, wartoe
Van mynnen ick verwoe!
Wat dyngen dat ick doe
Van eten, van dryncken ic nyet engroe,
My is, ick en weit nyet hoe.
Eya lacy! ic arme bluts,
Soe jamerlick heb ick dye muts.
Dye tyt valt my te lange,
Myn herte is soe bevangen
Plats midden in den drangen.
Ist dat geyn troesten ontfange,
Ick sterve mitten gangen.
Ick hebbe wael dusent wecke
Aldus den block gaen sleypen.
Ho come ic in desen moras?
Ick byn soe quaelick te pas,
Ick sitte tusschen twee stoelen in dye asse,
Nochtan soe heb ick geldeken in myn tasse
Dwilck ick verquys, verquas
Ende all mit schonen vrouwen,
Nyet voel en sall ick behouwen.
Mer wat ick hale off janck
Si singet all eynen sanck,
Si settet my up Hugen banck,
Mer wat si doit, ic nemt in danck.
Ick doeget all van kant,
Ick slacht den luyden van Tuylle
Voir tgaet gae ic huylen.
Ten baet geyn draven off lopen.
Dye muts moet ick daer knopen,
Ick byn daer in gecropen,
Synt Jorys vissop heb ic gesopen.
Ic byn dar in gedocken,
Wat listen dat ick soecken,
Ick blyve plat in den hoicken.
Sy holt myn hert so vast,
Dat is my den meisten last,
Ic byn oer eyn onwert gast,
Want sy up my nyet en past.
Ick slacht den erden quast,
Ich byn voel nauwer den ich klauwen,
Ic maech myn hoeft wael krouwen.
Hoer herte is alte maele
Van yser ende van staele.
Och, sall ick noch langer dwaelen?
Och ley der doyt, will my doch halen
All sonder langen dralen.
Voel liever weer ick doet
Dan te blyven in deser noit.
Myn hert wilt my beswycken,
Uutten lande will ick slycken
Ende nummermeer omme kycken,
Al byn ic arm, ic sall noch rycken.
Ic will nu van oer strycken.
Ade, myn uutvercoren,
Ic en gefs nyet all verloren.
Si heft my aen gesien
Dat ick oer gonste plien,
Sy en mochtet nyet gesien
Dat ic van oer sold vlien.
Sy spraeck: `ten moet nyet geschien.
Het vint nu alleyns,
Wy syns geworden eyns.'
All om dye liefste myn
So willick vrolick syn.
Schinckt in den coelen wyn,
Ich byn verloest uut alre pyn
Alsoe het wael is aenschyn.
Laet spoelen up dye luyte,
Dye vroude moet all uutte.
Dye dit lietken heft gemackt,
All ist nyet wael geraeckt,
Och dat ghys nyet en laecht,
Want hy alsoe gern slaept. | |
|
|
Venlo's liederenhandschrift
|
|
2e helft 16e eeuw / vroege 17e eeuw
|
| Brussel KB: II 144 |
| f32r |
|
| Komrij 1994, 385 |
|
