|
|
Een suuerlijc liedeken vol deuocien dwelc alle deuote herten moghen singhen op die wijse. Met vroechden willen wi singhen ende louen die triniteyt.
¶ Die brudegom seit OCh edel siele mercke ende hertelijck bekenne Dijns soeten brugoms wercke sijn onghemeten minne hoe veel ic heb gheleden al om die minne dijn dit soudt v wel bi reden doen doen den wille mijn
¶ Hemel lucht ende aerde heb ic ghemaect om di des hemels borgers waerde. sijn alle dijn dienaes [dienaers] vrij die beesten op aertrijcke die vogelen inder lucht. die bloemkens des ghelijcke. die bomen ende alle vrucht ¶ Die middelaer seyt ¶ O siele wtuercoren nv keert v hert tot hem ontsluyt ws herten oren en hoort ws brudegoms stem hi spreect tot v van binnen. o wtuercoren bruyt die werelt laet nv te minnen ende gaet v seluen wt ¶ Die brudegom seyt ¶ Ic wil dat ghi sult laten alle bliscap ende ghemack der creatueren af laten ende vlien der werelt wrack en hebt mi lief alleene ic wil v brudegom sijn der menschen trou is cleene int laetste niet dan pijn
¶ V herte te mi waert draghet ic ben van formen schoon. mijn moeder is reyn maget ic ben eens conincs soon dan moechdi eewelic leuen al in uwes brudegoms rijck. met gode sijn verheuen. den schonen enghelen ghelijck
¶ Wildi der werelt volgen en soecken aertsch iolijs. so maecti mi verbolghen en verliest tschoon paradijs den wech die is seer enghe die tot den leuene leyt strijt in duechden strenghe die crone is v bereyt
¶ Doer v o mijn verkoorne. heb ic scarpe weghen gegaen doer dijstelen en doer doorne. moet ghi mi volghen aen wilt ghi niet vermiden wellust in deser tijt. so siet ws brugoms lijden oft ghi hem ghelijcke sijt
¶ Om di ben ic ghedalet wt mijnder mogentheit en heb v schult betalet met groter bitterheit sijt mi getrou alleyne ende gaet di seluen wt ghi hebt mijn herte reyne gewont mijn suster bruyt
¶ Ic ben wt groter eeren gecomen in scande groot om v vruecht te vermeeren gaf ic mijn leuen ter doot ic was der coninghen coninc en wert der menschen knecht al duyster ic aen tcruce hinc al was ic des hemels licht
¶ Ic ben pelgrim gheworden ghecomen wt mijn rijck si wouden mi vermoorden o lief seer nidelijck Hoe vele heb ic geleden hoe bitter oec hoe swaer om v heb ic gestreden o bruyt driendertich iaer
¶ Ic was so seer onblide doen ic den strijt bestoet dat ic te dien tijde sweete water ende bloet oec was ic alleen die man doen ic ten strijt waert ginc minne dede mi die wapen an daer ic mede aen tcruce hinc
¶ O siele o seer geminde mijn bruyt mijn wtuercoren Nv volcht mi tot int ynde als ic v gae te voren ende laet v niet duncken dat ghi te weeckelic sijt mijn kelc met minnen ghedruncken en is so bitter niet
¶ En staet na geender rusten. ten is geens rustens tijt. mi mecht oec rustens lusten doen ic ghinc inden strijt om uwe ellendicheden daer toe was ic bereet ic hebbe die perse ghetreden met arbeyt swaer en wreet
uwen staf laet sijn mijn lijden als ghi vrmoeyet sijt merct doch tot allen tijden mijn pijn diep ende wijt ic heb om dine minne so swaren cruce ontfaen als lammeken soet van sinne ben ic ter doot gegaen
¶ Om v ben ic geclommen al op des crucen boom waer toe ben ic ghecommen o siele o suuer bloem om v te gheuen drincken ende enghels spise daer bi. mijn passie wilt ghedincken sedt al uwen troost in mi ¶ Die middelaer seyt totter bruyt ¶ O bruyt wilt met hem trueren met hem te liden kiest als doot tot allen vren die sijn liefste lief verkiest vliecht op dat cruce met sinne daer hi leet groten noot. o bruyt om uwe minne is nv v brudegom doot ¶ Die minnende siele seyt totten brudegom ¶ Ic wil met ganser herten al metten armen mijn omuangen met groter smerten v ihesu brudegom fijn. mijn hertken ic v gheue. o ihesu o liefste aenschijn oft ic sterue oft leue laet nemmermeer scheyden sijn ¶ Die middelaer seyt ¶ Nv vliecht opt cruce oetmoedich daer ic ane sterf den doot daer bloeyen bloemkens bloedich als vijf schone rosen root en gaet ghelijc die byen fijn en suyghen der bloemen saet daer si wt treckende sijn dalder sotste [soetste] honich raet
¶ Hi heeft v meer beminnet dan eenich moeder haer kint sijn bloet is wt gherinnet daer met ghi v suuer vint als ghi sijt vol misdaden hi en wilt v niet versmaen. als ghi begheert ghenaden hl [hi] wil v gerne ontfaen ¶ Die brudegom seyt ¶ Ic ben van v vergheten o lacen heel bi na voer ws herten doer gheseten daer ic dicwil cloppe en sla en mi wort gheweygert dat o alre liefste siele mijn te rusten in uwer herten stat. want dat al mijn weelden sijn
¶ O siele hoort mijn kermen waer om so vlietstu van mi laet v doch mijns ontfermen want ic dijn scepper si Mijn armen sijn ontploken mijn hooft gheneycht tot v mijn leden om v ghebroken coemt mijn bruyt en cust mi nv | |
|
Coelde van Munster, Dierick (co-auteur),
Dit is een suverlijc boecxken in welcke staen scone leysen ende veel scone gheestelike liedekens. Noch een liedeken van devocien ghemaect bi broeder Dirck van munster
|
1508
|
Den Haag KB: 228 G 35 (in facsimile) |
fd1r |
|
Dirk Geirnaert, naar bron, diplomatisch. |
|